Бүтээгдэхүүн, үйлчилгээндээ шилдэг инновац нэвтрүүлж, цахим үйлчилгээгээр тэргүүлэгч банк санхүүгийн байгууллагуудыг тодруулан өргөмжилдөг “Digital CX Awards 2025” шагнал гардуулах ёслолыг олон улсад нэр хүндтэй “The Digital Banker” сэтгүүлээс 7 дахь жилдээ зохион байгууллаа. Энэ үеэр ХААН Банкийг “Харилцагчийн туршлагаар тэргүүлэгч цахим банк”-аар шалгаруулсан бөгөөд “Харилцагчдад зориулсан шилдэг чатбот” нэвтрүүлсэн, “Цахим харилцагчийн туршлагын сайн стратегитай байгууллага” хэмээн онцоллоо.

ХААН Банк харилцагчдадаа хүргэж буй бүтээгдэхүүн үйлчилгээгээ улам бүр сайжруулж, сэтгэл ханамжийг нь нэмэгдүүлэх, түүний дотор банкны үйлчилгээ үзүүлж буй суваг тус бүрийн үйлчилгээний чанарт илүүтэй анхаарч ажилладаг билээ. Энэ үндсэн зорилтын хүрээнд үйл ажиллагаандаа Олон улсын дижитал харилцагчийн туршлагын IDCXS2022:02 стандарт нэвтрүүлснийг Их Британийн Стандартын институтээс 2024 онд батламжилсан билээ.

Өдгөө ХААН Банкаар дамжиж буй нийт санхүүгийн гүйлгээний 99.4 хувь нь цахимаар хийгдэж байна. Өөрөөр хэлбэл, харилцагч гар утас, компьютер, өөрт ойр байрлах ХААН Банкны цахим салбаруудад хандан бүх төрлийн гүйлгээ, санхүүгийн үйлчилгээг амар хялбар, хурдан шуурхай авах боломжийг ХААН Банк бүрдүүлээд буй. Тухайлбал, шимтгэлгүй, хурдан шуурхай үйлчилгээ авах боломжтой Digi Pay цахим хэтэвч тэргүүтэй технологийн дэвшил, инновацыг нэвтрүүлж, зээлийн үйлчилгээг бүрэн цахимжуулснаас гадна Монголд анх удаа хиймэл оюун ухаанд суурилсан цахим туслах Digi чат ботыг харилцагчийн үйлчилгээнд нэвтрүүлсэн зэргийг дурдаж болно.

Ийнхүү цахим бүтээгдэхүүн, үйлчилгээний цар хүрээ нэмэгдэхийн хэрээр банкны зүгээс харилцагчийн сэтгэл ханамж, банкны үйлчилгээ авахад туулах замыг амар хялбар болгохын зэрэгцээ цахим аюулгүй байдлыг нэн тэргүүнд тавьж, олон улсын ISO стандартуудыг ханган дэлхийн шилдэг туршлагыг харилцагчийн үйлчилгээндээ нэвтрүүлэн ажиллаж байна.

ХААН Банк харилцагчдынхаа санхүүгийн аяллын алхам бүрд хамгийн шилдэг, шинэлэг бүтээгдэхүүн, үйлчилгээг хүргэхээр эрхэм зорилгодоо тусгасны дагуу цаашид ч үйлчилгээний чанар, харилцагчийн сэтгэл ханамжийг өндөр байлгахад онцгой анхааран ажиллах болно.