Мэдээ мэдээлэл - Dornogovi.mn

Хаваржилтын хүндрэлийг хохирол багатай даван туулах зардлыг Засгийн газрын нөөц сангаас гаргана

zulaa — Wed, 08 Apr 2026 15:38:42 +0800

Хаваржилтын хүндрэлийг хохирол багатай даван туулах, ой, хээрийн гал түймэр, хүчтэй салхи, шуурга зэрэг байгаль цаг уурын гаралтай аюулт гамшигт үзэгдэл, ослоос урьдчилан сэргийлэх, бэлэн байдлыг хангах хүрээнд улсын нөөцөөс нэн шаардлагатай бараа, материал болон аймаг, нийслэл дүүрэгт газрын тосны бүтээгдэхүүн олгох, тэдгээрийг тээвэрлэн хүргэхэд шаардагдах зардлыг Засгийн газрын нөөц сангаас гаргахаар тогтлоо. Улсын хэмжээнд 2026 он гарсаар нийт 1282 удаагийн аюулт үзэгдэл, осол тохиолдож, 63 хүн амь насаа алдаж, 61 хүн гэмтжээ.

Байгаль, цаг уур, улирлын онцлог, шинж чанартай холбоотой хаврын улиралд шар усны үер, ой хээрийн гал түймэр, хүчтэй салхи шуурганд өртөж, иргэд, аж ахуй нэгж байгууллага амь, нас эд хөрөнгөөр хохирох эрсдэлтэй өндөр байдаг.Цаг уурын байгууллагаас гаргасан мэдээллээр агаарын температурын огцом өөрчлөлт үргэлжлэн ажиглагдах, салхи шуурганы давтагдал ихтэй байх магадлал өндөр байгаа тул ой, хээрийн гал түймэр зэрэг болзошгүй гамшгийн эрсдэлээс урьдчилан сэргийлэхийг Улсын онцгой комисс сэрэмжлүүлж байна.

Авиа компаниуд шатахууны үнийн өсөлтөөс шалтгаалан онцгой горимд шилжиж эхлэв

zulaa — Thu, 02 Apr 2026 13:19:52 +0800

Өмнөд Солонгосын үндэсний агаарын тээвэрлэгч Korean Air тийзний шатахууны үнийн огцом өсөлтийн нөлөөг саармагжуулах зорилгоор “онцгой удирдлагын горим”-д шилжиж байгаагаа мэдэгдлээ. Энэ нь АНУ–Израилийн Ираны эсрэг хийж буй дайны улмаас дэлхийн эдийн засаг доргиж буйтай холбоотой юм.

Тус компанийн төлөөлөгч “компанийн санхүүгийн тогтвортой байдлыг хангахын тулд дотоод зардал бууруулах арга хэмжээ хэрэгжүүлнэ” гэж хэлжээ.

Энэ нь Ираны дайны эдийн засгийн нөлөөллийг даван туулахын тулд арга хэмжээ авч буй Азийн агаарын тээврийн компаниудын хамгийн сүүлийн жишээ болж байна.

Дайн эхэлсэн хоёрдугаар сарын 28-наас хойш түүхий нефтийн үнэ 50 гаруй хувиар өссөн бол дэлхийн хэмжээнд онгоцны шатахууны үнэ хоёр дахин нэмэгдээд байна.

PwC Сингапур зөвлөх компанийн шинжээч Тан Чи Сян хэлэхдээ, ийм төрлийн онцгой арга хэмжээг агаарын тээврийн компаниуд өмнө нь Ковид -19 цар тахлын үеэр мөн ашиглаж байсан гэжээ. Түүний хэлснээр Азийн компаниуд “давхар цохилт”-д өртөөд байгаа бөгөөд энэ нь дэлхийн нефтийн үнийн өсөлт болон бүс нутгийн шатахууны хомсдол юм.

Азийн улсууд ямар арга хэмжээ авч байна вэ?

Өмнөд Солонгос улс Персийн булангаас нефть их хэмжээгээр импортолдог тул эрчим хүчний нийлүүлэлт тасалдахад онцгой эмзэг байдаг. Сүүлийн өдрүүдэд Korean Air, Asiana Airlines, Air Busan зэрэг хэд хэдэн агаарын тээвэрлэгч онцгой горимд шилжээд байна.

Эдгээр арга хэмжээнд хөрөнгө оруулалт хойшлуулах, зардал танах зэрэг дотоод шийдвэрүүд багтдаг бөгөөд зарим компани нислэгийн тоог бууруулах боломжтой гэж шинжээчид үзэж байна.

Korean Air компанийн дэд дарга Ү Ки-хонг ажилтнууддаа илгээсэн санамж бичигтээ шатахууны зардал огцом өсөхөд бэлтгэж байгаагаа мэдэгдсэн байна. Тэрээр эдгээр арга хэмжээ нь “нэг удаагийн” биш, харин компанийн бүтцийн суурийг бэхжүүлэх зорилготой гэж онцолжээ.

Эх газрын Хятад ба Хонг Конг

Дэлхийн хамгийн том нефть импортлогч Хятад улс эрчим хүчний үнийн хэлбэлзэлд эмзэг хэвээр байна.

China Eastern Airlines компани геополитикийн зөрчил, дайн нь энэ жилийн үйл ажиллагаанд сөргөөр нөлөөлж болзошгүй гэж анхааруулжээ. Ираны дайн эхэлснээс хойш Хятадын олон агаарын тээвэрлэгч шатахууны нэмэлт төлбөрийг өсгөсөн байна.

Мөн дотоодын үнийг тогтворжуулахын тулд нефть боловсруулах үйлдвэрүүдэд экспорт зогсоох чиглэл өгсөн талаар мэдээлжээ.

Хонконгод Cathay Pacific бүх нислэгт шатахууны нэмэлт хураамж нэмж, тийзний үнэ огцом өссөн байна.

Япон

Япон улс нь олон улсын тээврийн төв бөгөөд онгоцны эд анги үйлдвэрлэлийн томоохон улс юм. All Nippon Airways дөрөв, тавдугаар сард олгогдох тасалбарын шатахууны нэмэгдлийг өсгөхгүй гэж мэдэгджээ.

Тус компани урьдчилан шатахууны үнэ тохиролцсон нөлөө одоогоор “хязгаарлагдмал” байна гэж тайлбарласан.

Japan Airlines шатахууны хомсдолтой холбоотой тодорхой арга хэмжээ хараахан аваагүй байна. Гэхдээ Ойрхи Дорнодын чиглэл хаагдсанаас шалтгаалан Европ руу чиглэсэн нислэгийн эрэлт нэмэгдэж, үнэ өссөн байна.

Энэтхэг

Энэтхэгийн агаарын салбар Ойрхи Дорнод руу чиглэсэн нислэгүүд цуцлагдсанаас ихээхэн хохирол амсаж байна.

Гэсэн хэдий ч эрэлт хэвээр байгаа тул Air India шинэ нислэгийн хуваарийг өдөр бүр шинэчилж байна. Энэтхэгийн иргэний нисэхийн байгууллага дотоодын нислэг энэ оны гуравдугаар сараас аравдугаар сар хүртэл 10 орчим хувиар буурна гэж таамаглажээ.

Гуравдугаар сарын 23-нд засгийн газар тийзний үнийн дээд хязгаарыг түр цуцалж, компаниудад үнийг нэмэх боломж олгосон. Мөн Энэтхэгийн компаниуд Пакистаны агаарын орон зайг ашиглахыг хориглосон шийдвэрийн улмаас нэмэлт хүндрэлтэй тулгарч байгаа юм.

Сингапур

Singapore Airlines болон түүний хямд өртөгтэй охин компани Scoot шатахууны үнийн өсөлтөөс шалтгаалан тийзний үнийг нэмэгдүүлжээ. Шатахуун нь компанийн нийт зардлын 30 орчим хувийг эзэлдэг хамгийн том зардал хэвээр байна. Гэсэн ч үнийн өсөлт нь бүх зардлыг бүрэн нөхөхгүй гэж компанийн төлөөлөгч мэдэгдсэн байна.

Сингапурын иргэний нисэхийн байгууллага 2026 оны дөрөвдүгээр сараас хэрэгжих байсан “ногоон шатахууны татвар”-ыг хойшлуулжээ. Энэ татвар нь сэргээгдэх эх үүсвэрээс гаргаж авсан тогтвортой шатахууны хэрэглээг дэмжих зорилготой байсан юм.

Бусад орнуудын арга хэмжээ

Филиппин улс гуравдугаар сарын 24-нд дэлхийд анх удаа “эрчим хүчний онцгой байдал” зарласан байна. Ерөнхийлөгч Фердинанд Маркос шатахууны хомсдлоос болж онгоцууд газардаж болзошгүй гэж анхааруулжээ.

Харин Вьетнам улс шатахууны нийлүүлэлт саатсанаас дөрөвдүгээр сараас хомсдол үүсэж болзошгүй хэмээн мэдэгдэж, Vietnam Airlines зарим дотоод нислэгээ цуцалсан байна.

Шинжээчдийн үзэж байгаагаар томоохон агаарын тээвэрлэгчид нөхцөл байдлыг даван туулах илүү боломжтой байдаг. Жишээлбэл Singapore Airlines Лондон руу хийдэг нислэгээ нэмэгдүүлсэн бол Qantas Airways Европ руу чиглэсэн нислэгээ нэмэгдүүлжээ.

Харин нөгөө талд Jetstar зэрэг жижиг компаниуд нислэгээ танахад хүрч байна.

Alton Aviation Consultancy-ийн шинжээч Брайан Терри хэлэхдээ, хуучин онгоц ашигладаг жижиг компаниуд шатахуунд илүү их өртдөг тул хамгийн их дарамтанд орж байна гэжээ. “Тэдэнд хямралыг даван туулахад ашиглах боломжит арга хэрэгсэл цөөн байна” гэдгийг ч мөн онцолсон байна.

Японы Формула-1 тэмцээнд Антонелли түрүүллээ

zulaa — Thu, 02 Apr 2026 10:33:05 +0800

Японы "Формула-1"-ийн Гран При тэмцээн гуравдугаар сарын 29-нд Сүзүка тойрог замд болж, Италийн залуу нисгэгч Андреа Кими Антонелли түрүүллээ.

Мерседес багийн нисгэгч Антонелли уралдааны эхэнд байр алдаж зургаадугаар байр хүртэл ухарсан ч уралдааны дунд үеэр аюулгүйн машины горим ашигласан стратегийн давуугаар дахин тэргүүлж, улмаар 13 секунд гаруй давуугаар барианд орсон байна. Энэ ялалт нь түүний улирлын дараалсан хоёр дахь ялалт болж, аваргын онооны хүснэгтийг тэргүүлэх боломж бүрдүүлжээ.

Хоёрдугаар байрт Макларен багийн Оскар Пиастри орсон бол гуравдугаар байрт Феррари багийн Шарль Леклер барианд орсон байна. Харин Жорж Рассел дөрөвдүгээр байр эзэлж, Ландо Норрис тавдугаар байрт оржээ. Өмнөх улирлын аваргуудын нэг Макс Ферстаппен энэ удаа наймдугаар байрт барианд орсон байна.

2026 оны улирлын эхний гурван уралдааны дараа Мерседес баг хүчтэй эхлэл үзүүлж, залуу нисгэгч Антонелли аваргын онооны төлөөх тэргүүлэгчдийн нэг болж эхэллээ.

Ийнхүү Японд болсон "Формула-1" тэмцээн залуу нисгэгчийн ялалтаар өндөрлөснөөр 2026 оны улирлын аваргын төлөөх өрсөлдөөн улам ширүүсэх дохио боллоо.

Японы Сүзүка тойрог зам нь "Формула-1" тэмцээний хувьд хамгийн хүнд замуудын нэгт тооцогддог. Наймын тооны хэлбэрийн бүтэцтэй, нарийн эргэлтүүд хосолсон энэ зам нисгэгчдийн ур чадвар, багуудын стратегийг хамгийн их сорьдог гэдгээрээ алдартай.

Д.Мөнх-Эрдэнэ: Л.Оюун-Эрдэнийн ярьсан бүх юм гүтгэлэг, намайг “Бодь” компанид ажилласан гэж хүртэл худлаа ярилаа

zulaa — Thu, 26 Mar 2026 10:52:58 +0800

Ерөнхий сайд асан, УИХ-ын гишүүн Л.Оюун-Эрдэнэ NTV телевизийн "Лхагвын тойм" нэвтрүүлэгт оролцох үеэрээ ХЗДХ-ийн сайд Б.Энхбаярыг "Бодь групп"-ээс 500 мянган ам.долларын хандив авсан гэх мэдээлэл хийсэн. Тэгвэл түүний уг мэдээллийн хариуд, ХЗДХ-ийн сайд Б.Энхбаяр, дэд сайд Д.Мөнх-Эрдэнэ нар мэдээлэл хийлээ.

ХЗДХ-ийн дэд сайд Д.Мөнх-Эрдэнэ: Эхнээсээ авахуулаад дуустал гүтгэлэг. Нүүрсний том оффтэйк гэрээнүүд Л.Оюун-Эрдэнийг ЗГХЭГ-ын дарга, Ерөнхий сайд, ҮАБЗ-ийн гишүүнээр ажиллаж байх үед хийгдсэн гэрээнүүд.

Л.Оюун-Эрдэнийн гарын үсэгтэй, олон арван компаниудтай тэрбум, тэрбумаар шууд гэрээ байгуулсан тушаал, шийдвэрүүд байгаа даа. Цаг өөрчлөгдсөн. Нэг аргаар олон удаа түмэн олныг хуурч, залилж чадахгүй ээ, Уранбураак Л.Оюун-Эрдэнэ ээ! Наад арга чинь удахгүй үнэнд гүйцэгдэнэ. Түүний ярьсан бүх асуудлууд өөртэй нь холбоотой. Дандаа түүний гарын үсэгтэй бичиг баримтууд шийдвэрүүд. Хаа байсан ямар ч оролцоогүй хүмүүсийг татан оролцуулах гэж үзэж байна. Үнэн мөн хурдан тогтоогдоно. Бид нар баримт л ярина. Тэд нар шиг худлаа гүтгэж ярихгүй. Би 2004, 2005 оны үеди Голомт банкинд ажиллаж байсан. Намайг Бодь компанитай холбоотой гэж гүтгэлээ. Энэ хүмүүстэй олон асуудлууд өчнөөн тэрбумаараа АТГ-т яригдаж шалгагдаж байгаа. Зургаан оффтэйк гэрээнүүдийн дөрвөн нь түүний барьж байсан Засгийн газрын үед хийгдсэн байдаг.

Албаны нууц нэрээр хулгайлгаа далд хийдэг байсныг нь бид хүчингүй болгож, ил болгохоор ажиллаж байгаа. УИХ-д өргөн барьсан байгаа хуулийг яаралтай баталж өгөөч ээ. Ард түмнээс хулгайлсан мөнгийг ил болгоход их чухал үүрэг гүйцэтгэнэ.

Йеменд чимээгүй өлсгөлөн нүүрлэж байна

zulaa — Fri, 20 Mar 2026 10:38:12 +0800

Даян дэлхийн анхаарал дайн дажинд төвлөрч байх зуур Йеменд чимээгүй өлсгөлөн нүүрлэж байна. Тус улсын хүн амын тал хувь нь өлсгөлөнд нэрвэгдээд байгаа ч үүнийг тоож, авч хэлэлцэж байгаа хэн ч алга. 2026 оны эхэн үеийн байдлаар тус улсын 18 сая гаруй хүний хүнсний аюулгүй байдал алдагдаад байна. Асуудлын цар хүрээг арай өөрөөр тайлбарлавал, Нидерландын хүн ам нийтээрээ өлсгөлөнд нэрвэгдээд байна гэсэн үг.

Олон улсын аврах хороо өнгөрсөн жил тус улсад судалгаа хийхэд бараг хүн бүр хоол хүнсийг нэн тэргүүний хэрэгцээтэй зүйлээр нэрлэжээ. Мөн нийт айл өрхийн 80 орчим хувь нь өлсгөлөнгийн хурцадмал хэлбэрт нэрвэгдээд байгааг тогтоожээ. Айл өрхүүд талх, ус төдийхнөөр нь амь зогоож, эцэг эхчүүд хүүхдээ өлсгөхгүйн тулд өөрсдөө хоосон хонож байна.

Хүнсний аюулгүй байдлын нэгдсэн шатлалын ангилал буюу улс орон, бүс нутагт хүмүүс хэр хэмжээнд өлсгөлөнд өртөж байгааг үнэлдэг таван шатлалт систем бий. Уг системээр Йемений дахин нэг сая хүн ам 3+ шатлалын өлсгөлөнд нэрвэгдэх эрсдэлтэй байна. Энэ шатлалд байгаа айл өрхүүд өдөр тутамдаа хооллож чадахгүй, өр зээл тавьж, эд зүйлээ зарахаас өөр аргагүйд хүрдэг. Мөн энэ шатанд хүүхдүүд хоол тэжээлийн дутагдалд орж, энгийн өвчин үхлийн аюултай болох нь бий.

Ирэх хоёр сарын хугацаанд Йемений дөрвөн ч дүүрэгт нөхцөл байдал улам хүндрэх төлөвтэй байна.

Йемен улс хүнсний бүтээгдэхүүнийхээ тун бага хувийг өөрсдөө үйлдвэрлэдэг. Хэрэглээний үр тарианы 80-90 хувь нь импортоос хамааралтай байдаг. Гэвч олон жилийн турш үргэлжилсэн зөрчилдөөн, эдийн засгийн уналтаас болж бүтцийн гажуудал тус улсад үүсээд буй. Мөн уур амьсгалын өөрчлөлтөөс үүдэлтэй хур тунадасны хэмжээ, хэт халалт ч хөдөө аж ахуйн бүтээгдэхүүний гарцад нөлөөлж байна.

Ангалын ирмэгт удаан хугацаанд оршин тогтнож буй Йемен улсыг нэгэн цагт хүмүүнлэгийн санхүүжилт авардаг байлаа. Гэвч сүүлийн жилүүдэд хүмүүнлэгийн санхүүжилт эрс багасч, эдийн засгийн уналт, уур амьсгалын өөрчлөлт, цэргийн ажиллагаа хавсарснаар сая сая хүний амь эрсдэлд ороод байна.

ЭХ СУРВАЛЖ: AL JAZEERA

Газрын тосны үнэ өсөж, хувьцааны ханш унав

zulaa — Thu, 12 Mar 2026 09:23:40 +0800

Иранд явуулж буй цэргийн ажиллагаанаас шалтгаалж зах зээл дээрх газрын тосны үнэ өсөж, голлох хувьцаануудын ханш уналаа. Ойрх Дорнодын бүс нутагт тээвэрлэлтийн асуудал үүссэний улмаас брент маркийн газрын тос үнэ баррель тутамдаа 80 ам.доллароос даваад байна. Ялангуяа Ормузын хоолойг хаасан нь өдөрт 15 сая баррель газрын тосны нефтийн тээвэрлэлт зогсоно гэсэн үг. ОУВС болон санхүүгийн бусад байгууллагууд газрын тосны үнийн өсөлт нь дэлхий даяар инфляцын дарамтыг нэмэгдүүлнэ гэж дүгнээд байна. Хэдийгээр ОПЕК+ орнууд ням гарагт хуралдахдаа дөрөвдүгээр сард өдөрт 206 мянган баррель газрын тос нийлүүлэхээр нэмэгдүүлсэн боловч уг газрын тосны дийлэнх хэсгийг Ойрх Дорнодоос нийлүүлэх шаардлагатай юм.

Цэргийн ажиллагаа хөрөнгийн зах зээлд сүүдэр тусгалаа. Европын “EUROSTOXX 50” хувьцааны фьючерс 1.9%, “DAX” 1.8% буурсан бол “S&P 500” болон “Nasdaq” индексүүд 1.1% буурчээ. Азийн томоохон хувьцаануудын нэг Японы “Nikkei” индекс хамгийн их буюу 2.2% унаад байна.

Сайд Б.Чойжилсүрэн алга хавсран "бөхөлзөж" байгаад хариуцлагаас мултрах уу?!

zulaa — Wed, 04 Mar 2026 11:22:44 +0800

Монгол улсад төрд гарчихаараа "хариуцлага" хүлээдэг ухамсартай улс төрч байхгүй нь харамсмаар. Улсаараа тог цахилгаангүй болоход ч сайд нь суудалтайгаа гүрийн наалдсаар буй. Үүний тод жишээ нь Эрчим хүчний сайд Б.Чойжилсүрэн. Уг нь сайдын суудлаасаа мулт үсрэх болзлоо бол тэр хэдийнээ хангачихсан. Даанч салж өгдөггүй өгөр толгой бололтой.

Түүнд Ерөнхий сайд Г.Занданшатар өнгөрсөн нэгдүгээр сарын 28-ны өдрийн Засгийн газрын хуралдааны үеэр эрчим хүчний салбарт үүссэн гэмтэл саатал, цахилгааны хязгаарлалтыг цэгцлэх 30 хоногийн хугацаатай үүрэг өгсөн. Ерөнхий сайд тухайн үед "Б.Чойжилсүрэн сайдад нэг сарын хугацаатай үүрэг даалгавар өгсөн байдаг.

ДЦС-IV-ын есөн зуухнаас дөрөвт нь гэмтэл гарсан. Мөн ДЦС-V бүтээн байгуулалтыг Х.Нямбаатар даргатай хамтран яаралтай эхлүүл. Бөөрөлжүүтийн цахилгаан станцад тусламж үзүүлж, Баянгийн цахилгаан станцын ажлын явцыг танилцуул. Тог цахилгаан тасарснаас бол иргэдийн аж амьдралд маш хүндрэл учруулж байна. Эрчим хүчний нэгдсэн бодлогоо цэгцэлсний дараа чөлөөлөх ёстой. Асуудлаа шийдэхгүй бол хариуцлага тооцно хэмээн хатуухан сануулга өгөөд үүрэгдсэн.

Гэтэл өнөөх үүрэг даалгавар биелүүлэх хугацаа хоёр хоногийн дараа дуусах нь ээ. Салбар нь элгээрээ хэвтэж, иргэд нь лаа шүдэнзтэй өвөлжиж, халаалтаа цахилгаанаар шийдсэн олон айл өрх эдийн засгийн багагүй хохирол амссан. Гэвч үүнд хэн ч хариуцлага үүрэхгүй нь тэр бүү хэл Б.Чойжилсүрэн сайд нь алга хавсран бөхөлзөж "Би ажлаа хүлээлгэж өгөхөд өнөөдөр ч, маргааш ч бэлэн байна" хэмээж хэвлэлд ярилцлага өгөөд сууж байна.

Тэрээр "Эрчим хүчний салбарт хийсэн 22 их наяд төгрөгийн хөрөнгө оруулалтын 14 их наяд төгрөг нь хувийн салбарын хөрөнгө оруулалт эзэлж байна. Бид энэ хүмүүсийг эрчим хүчний салбарт хөрөнгө оруулаач гэж аргадаж гүйсний хүчинд ийм хэмжээний хөрөнгө оруулалтыг хийсэн. Бусдыг нь олон улсын хөнгөлөлттэй зээлийн эх үүсвэрээр шийдэх шаардлагатай байна. Жишээлбэл, Улаанбаатар хотод техникийн нөхцөлүүдийг хүссэнээр нь олговол одоогийн 1000 МВт-ын ачаалалтай хүчин чадал хоёр, гуравхан жилийн дотор 3000 МВт-д хүрнэ. Тийм учраас нийслэлийн баруун, зүүн талд 500 кВт-ын хүчин чадалтай дэд станц барьж, дахиад хот дотор дамжуулах түгээх сүлжээг өргөтгөхөд 2 тэрбум ам.доллар хэрэгтэй гэсэн судалгаа гарсан. Энэ мөнгийг хаанаас яаж гаргах вэ гэдгийг судалж, хөөцөлдсөн.

Азийн дэд бүтцийн хөрөнгө оруулалтын банк нэг тэрбум ам.доллараар санхүүжүүлэхэд бэлэн гэдгээ илэрхийлсэн. Монгол Улсын Засгийн газар хүсэлтээ өгчихвөл санхүүжүүлэх юм.

Үүнээс гадна БНХАУ-ын "Экзим" банк 249 сая ам.доллараар санхүүжүүлэхэд бэлэн байгаагаа илэрхийлсэн бол Дэлхийн банк 600 сая ам.доллараар санхүүжүүлнэ гэсэн. Засгийн газар баталгаа гаргавал "Цахилгаан дамжуулах үндэсний сүлжээ" ТӨХК болон "Улаанбаатар цахилгаан түгээх сүлжээ" ТӨХК-ийг нэн хөнгөлөлттэй эх үүсвэртэй зээлээр санхүүжүүлэхэд бэлэн гэдэг байр сууриа Ерөнхий сайд асан Л.Оюун-Эрдэнийн Засгийн газрын үед илэрхийлж, Монголд ирж байсан" хэмээн ярив.

Өөрөөр хэлбэл, Эрчим хүчний салбарыг "аврахад" нийт 2 их наяд төгрөг шаардлагатай гэдэг урьдчилсан тооцоог хийсэн гэдгээ хэлж, шаардлагатай бол 2026 оны улсын төсөвт тодотгол хийх шийдвэрийг Засгийн газраас гаргаж, УИХ дэмжвэл эрчим хүчний салбарт тулгамдсан асуудал шийдэгдэнэ гэдгийг сайд Б.Чойжилсүрэн онцолсон удаатай. Түүний хэлсэн санхүүг нь Засгийн газраас төсөвлөж өгөхгүй бол түүний буруу огтоос биш болж таарах нь ээ дээ.

"Өвлийн оргил ачааллын үе дуусаагүй байна. Энэ асуудлуудыг чангаруулаад явж байна. Салбарын санхүү эдийн засаг хүндэрсэн байгаа. Тарифыг цаг тухайд нь өөрчилж шинэчилж чадаагүйгээс шалтгаалаад хүндрэлтэй асуудлууд бий. Магадгүй Засгийн газар дэмжээд, төсвийн тодотгол хийж УИХ-аар баталбал энэ асуудал шийдэгдэх болов уу гэсэн байр суурьтай байна" гэж Б.Чойжилсүрэн 30 хоногийн хугацаанд хийж гүйцэтгэсэн ажлаа дүгнэн ярьжээ.

Нийслэлийн 2026 оны төсвийг тодотголоо

zulaa — Tue, 03 Mar 2026 14:09:17 +0800

НИТХ-ын ээлжит бус хуралдаанаар 2026 оны төсвийг тодотголоо. Уг тодотголоор 2026 оны нийслэлийн төсөвт орлогыг 5.4 их наяд төгрөг, урсгал зардлыг 71.6 тэрбум төгрөгөөр нэмэгдүүлж, 8.8 тэрбум төгрөгийн зардлын шилжүүлэг хийж баталжээ.

Тодотгосон төсөвт онцолж харууштай хэд, хэдэн хөрөнгө оруулалт байна. Тухайлбал “Улаанбаатар трам” төслийн санхүүжилтэд 350 тэрбум төгрөг, “Дулааны V цахилгаан станц” төсөлд нийслэлээс хариуцах хөрөнгө болох 200 тэрбум төгрөг, “НҮБ-ын цөлжилттэй тэмцэх талуудын 17 дугаар бага хурлын байгууламжийн түрээсэнд 70.1 тэрбум төгрөг, “Сүү” хөтбөлбөрийн хүүгийн дэмжлэгт таван тэрбум төгрөг тус, тус баталжээ.

Нийслэлийн төсвийн тодотголоор нэмэгдэж буй зардлыг “Сэлбэ дэд төв”-ийн борлуулалтаас төвлөрүүлэхээр төлөвлөжээ.

МАН-ын бага хурал баасан гарагт болно

zulaa — Wed, 25 Feb 2026 14:35:05 +0800

МАН Бага хурлаа энэ долоо хоногийн баасан гарагт буюу энэ сарын 27-нд хуралдуулахаар товлоод байна. Тус хуралд намын дарга Н.Учрал улс төрийн илтгэл тавих юм байна.

Мөн намын Ерөнхий нарийн бичгийн дарга Я.Содбаатар, Ерөнхий сайд Г.Занданшатар нар илтгэл тавихаар төлөвлөжээ. Энэ үеэр МАН-ын дэргэд байгуулсан 11 бодлогын хороо хуралдана. Намын шинэ дүрмээр МАН-ын бага хурал 597 гишүүнтэй болсон билээ.

Стандарт хангасан агуулахад хэвийн боовыг 21 хоног хадгалах боломжтой

zulaa — Thu, 12 Feb 2026 10:56:23 +0800

Тавгийн идээний хэвийн боовыг чанар, аюулгүй байдлыг нь алдагдуулахгүй хадгалахын тулд стандартын шаардлагад нийцсэн нөхцөл бүрдүүлэх хэрэгтэйг Стандарт хэмжил зүйн газар (СХЗГ)-аас анхааруулав. Сар шинийн баярыг тохиолдуулан зах, худалдааны төвүүдэд олон нэр, төрлийн хэвийн боов худалдаж буй. Тэдгээр нь чанарын шаардлага хангасан агуулахад хадгалсан, эсэх нь тодорхойгүй байдаг. Тэгвэл хэвийн боовыг хуурай, цэвэр, хортон мэрэгчгүй, агаарын солилцоо сайтай, нарны шууд тусгалаас хамгаалсан, агаарын харьцангуй чийгшил 75 хувиас ихгүй, 10-25 хэмийн темпаратуртай нөхцөлд хадгалах ёстой аж. Мөн “Хүнсний барааны агуулах. Техникийн ерөнхий шаардлага” стандартыг хангасан агуулахад үйлдвэрлэсэн өдрөөс эхлэн 21 хоног хүртэл хадгалах боломжтой гэнэ.

Харин нийлэг уут, хайрцагт битүүмжлэн савласан бүтээгдэхүүнийг 0-6 хэмийн температуртай хөргүүрт 45 хоног хүртэл хадгалж болно. Мөн хэвийн боовыг хөлдөөсөн тохиолдолд хасах 12 хэмээс дээшгүй температурт хөлдүү байдлаар гурван сар хүртэл хадгалах боломжтой аж. Хөлдөөсөн боовыг гэсгээх заавар, гэсгээсний дараах хадгалах нөхцөл, хугацааг бүтээгдэхүүний шошгонд тодорхой тусгах ёстой. Иймд үйлдвэрлэгчид Хэвийн боовны техникийн шаардлага MNS 0461:2022-ыг мөрдөх, иргэд хадгалалтын шаардлага, хугацааг сайтар нягтлахыг СХЗГ-аас зөвлөлөө.